സ്വവര്‍ഗ രതി: സോളിഡാരിറ്റി പ്രതിഷേധ പ്രകടനം

ഈരാറ്റുപേട്ട: സ്വവര്‍ഗ രതിക്ക് അനുകൂലമായി കേന്ദ്ര സര്‍ക്കാര്‍ സുപ്രീം കോടതിയില്‍ സ്വീകരിച്ച നിലപാടിനെതിരെ സോളിഡാരിറ്റി യൂത്ത് മൂവ്‌മെന്റ് ഈരാറ്റുപേട്ട ഏരിയാ കമ്മിറ്റിയുടെ ആഭിമുഖ്യത്തില്‍ പ്രതിഷേധ പ്രകടനം നടത്തി. ധാര്‍മികതക്ക് നിരക്കാത്ത ഈ നടപടിയില്‍ രാഷ്ട്രീയ പാര്‍ട്ടികള്‍ നിലപാട് വ്യക്തമാക്കണം. സ്വവര്‍ഗ രതി നിയമവിധേയമാക്കാനുള്ള സര്‍ക്കാരിന്റെ ശ്രമം ചെറുത്തുതോല്‍പിക്കാന്‍ നന്മ കാംക്ഷിക്കുന്ന ജനങ്ങള്‍ തയാറാവണമെന്ന് ജില്ലാ സെക്രട്ടറി വി.എ. ഹസീബ് ആവശ്യപ്പെട്ടു.
ഏരിയാ പ്രസിഡന്റ് പി.എസ്. ഹക്കീം, സിയാഉല്‍ ഹഖ്, ബഷീര്‍, ഷഹീര്‍ എന്നിവര്‍ നേതൃത്വം നല്‍കി.

സോളിഡാരിറ്റി പ്രവര്‍ത്തന ഫണ്ട് വിജയിപ്പിക്കുക

മഅ്ദനിക്ക് ജാമ്യ നിഷേധം: സോളിഡാരിറ്റി പ്രതിഷേധ പ്രകടനം നടത്തി

ഈരാറ്റുപേട്ട: മഅ്ദനിക്ക് സുപ്രീംകോടതി ജാമ്യം നിഷേധിച്ചതില്‍ പ്രതിഷേധിച്ച് സോളിഡാരിറ്റി ഈരാറ്റുപേട്ട ഏരിയ  നേതൃത്വത്തില്‍ പ്രതിഷേധ മാര്‍ച്ച് നടത്തി.
ഒമ്പതര വര്‍ഷം ജാമ്യവും പരോളും നിഷേധിക്കപ്പെട്ട് കോയമ്പത്തൂര്‍ ജയിലില്‍ യൗവനം തീര്‍ന്ന മഅ്ദനി രണ്ടുവര്‍ഷമായി ബംഗളൂരു അഗ്രഹാര ജയിലില്‍ ജാമ്യം നിഷേധിച്ച് കഴിയുകയാണ്.എന്നാല്‍,അഴിമതിക്കാരായ രാജയും കനിമൊഴിയും ജയിലില്‍ പോലും സുഖവാസമനുഭവിക്കുകയും ജാമ്യം നേടുകയും  ചെയ്യുന്നു. വികലാംഗനും നിരവധി രോഗത്തിന് അടിമയായിട്ടും ചികിത്സ പോലും നിഷേധിച്ചിരിക്കുന്ന മഅ്ദനിക്ക് മാനുഷിക പരിഗണന നല്‍കണമെന്ന് യോഗം ആവശ്യപ്പെട്ടു.മഅ്ദനിയെ ജയിലില്‍ പീഡിപ്പിക്കുന്ന രംഗം പ്രകടനത്തില്‍ പ്രതീകാത്മകമായി ചിത്രീകരിച്ചു. സോളിഡാരിറ്റി ജില്ലാ സെക്രട്ടറി വി.എ. ഹസീബ് സംസാരിച്ചു. ഏരിയാ പ്രസിഡന്‍റ് പി.എസ്. അബ്ദൂല്‍ ഹക്കീം, സെക്രട്ടറി കെ.എസ്. നിസാര്‍,അന്‍സാര്‍ അലി, മാഹിന്‍ മുജീബ്, ബിന്‍സാദ്, നസീര്‍, മജീദ് എന്നിവര്‍ നേതൃത്വം നല്‍കി.

25 പവനോളം "ആക്രി സ്വര്‍ണം' തിരികെ നല്‍കി നാടിന്നഭിമാനമായമായവരെ ആദരിച്ചു

ഈരാറ്റുപേട്ട: 25 പവനോളം "ആക്രി' സ്വര്‍ണം തിരികെ നല്‍കി നാടിന്നഭിമാനമായമായവരെ സോളിഡാരിറ്റി ആദരിച്ചു. ഈരാറ്റുപട്ടയിലും പരിസര പ്രദേശങ്ങളിലും വീടുകളില്‍ ചെന്ന് ആക്രി കച്ചവടം നടത്തി ജീവിക്കുന്ന വാഴമറ്റം ഭാഗത്ത് താമസിക്കുന്ന കൊച്ചുമുഹമ്മദ് എന്ന കൊച്ചാമി അഫ്‌സല്‍, ഇസ്മായില്‍ എന്നിവരാണ് ആക്രി സാധനങ്ങള്‍ക്കൊപ്പം ലഭിച്ച 25 പവനോളം വരുന്ന സ്വര്‍ണാഭരണങ്ങള്‍ തിരികെ നല്‍കി നാടിന് അഭിമാനമായത്. കഴിഞ്ഞ ഡിസം. 29 നായിരുന്നു പ്രവിത്താനം കെയിക്കല്‍ കെ.എല്‍. ആന്റണിയുടെ വിട്ടില്‍ നിന്നും 110 രുപക്ക് പഴയ വി.സി.ആറും പഴയ ഇരുമ്പും ഇവര്‍ വാങ്ങിയത്. വീട്ടിലെത്തി ഉള്ളിലുള്ള ചെമ്പ് ഭാഗങ്ങള്‍ വേര്‍തിരിക്കാന്‍ വി.സി.ആര്‍ തുറന്നപ്പോഴാണ് 25 പവനോളം സ്വര്‍ണ്ണാഭരണങ്ങള്‍ ഇവരുടെ ശ്രദ്ധയില്‍പെട്ടത്. ഉടന്‍ തന്നെ സാധനങ്ങള്‍ വാങ്ങിയ വീട്ടില്‍ തിരിച്ചെത്തി സ്വര്‍ണാഭരണങ്ങള്‍ തിരികെ നല്‍കി ഇവര്‍ മാതൃകയാവുകയായിരുന്നു. ബാങ്കില്‍ പണയംവെച്ചിരുന്ന സ്വര്‍ണം തിരിച്ചെടുത്തപ്പോള്‍ മോഷ്ടാക്കളെ ഭയന്ന് ഉപയോഗിക്കാതെ വെച്ചിരുന്ന വി.സി.ആറിനുള്ളില്‍ ഒളിപ്പിച്ചു വെച്ചതായിരുന്നുവെന്ന് വീട്ടുകാര്‍ പറഞ്ഞു. ഇത് ഓര്‍മിക്കാതെ കച്ചവടക്കാര്‍ വന്നപ്പോള്‍ അവര്‍ക്ക് വി.സി.ആര്‍ എടുത്തു കൊടുക്കുകയായിരുന്നു. പാരിതോഷികം നല്‍കാന്‍ വീട്ടുടമ തയാറായെങ്കിലും ഇവര്‍ വാങ്ങിയില്ല. വീടുകളില്‍ ചെന്ന് ആക്രികച്ചവടം നടത്തി ജീവിക്കുന്നവരെക്കുറിച്ച് പെതു സമൂഹത്തിന്റെ ധാരണ തിരുത്താന്‍ ഈ സംഭവം ഇടയാക്കണമെന്ന പ്രാര്‍ഥന മാത്രമാണ് മൂന്നുപേര്‍ക്കും ഉളളത്.
സോളിഡാരിറ്റി എരിയപ്രവര്‍ത്തന ഫണ്ട് ഉദ്ഘാടനത്തോടനുബന്ധിച്ചു കടുവാമുഴിയില്‍ നടന്ന പരിപാടിയിലാണ് ഇവരെ ആദരിച്ചത്.

സോളിഡാരിറ്റി പ്രവര്‍ത്തന ഫണ്ട് ഏരിയാ ഉദ്ഘാടനം

ഈരാറ്റുപേട്ട: സോളിഡാരിറ്റി 2011-12 വര്‍ഷത്തേക്കുളള പ്രവര്‍ത്തന ഫണ്ട് ഉദ്ഘാടനം ഈരാറ്റുപേട്ട ബ്ലോക്ക് പഞ്ചായത്ത് പ്രസിഡണ്ട് അഡ്വ. ജോമോന്‍ ഐക്കര നിര്‍വഹിച്ചു. വ്യാപാരി വ്യവസായി എകോപന സമിതി പ്രസിഡണ്ട് എ.എം.എ. ഖാദറില്‍ നിന്നും സോളിഡാരിറ്റി ഈരാറ്റുപേട്ട ഏരിയാ പ്രസിഡന്റ് പി.എസ്. അബ്ദുല്‍ ഹഖീം ഫണ്ട് ഏറ്റുവാങ്ങി.

മാലിന്യ നിര്‍മാര്‍ജനത്തിന് ബയോ പെഡസ്റ്റല്‍ കോളം

ഈരാറ്റുപേട്ട: ഐഡിയല്‍ റിലീഫ് വിംഗിന്റെ (ഐ.ആര്‍.ഡബ്ല്യു) നേതൃത്വത്തില്‍ ബയോ പെഡസ്റ്റല്‍ കോളം നിര്‍മിച്ചു നില്‍കി. മാലിന്യ നിര്‍മാര്‍ജനത്തിന് നൂതന സംരംഭവുമായി ഐഡിയല്‍ റിലീഫ് വിംഗാണ് രംഗത്തെത്തിയത്.
ഈരാറ്റുപേട്ട പഞ്ചായത്തിലെ മൂന്ന്, നാല് വാര്‍ഡുകളിലെ 50 കുടുംബങ്ങള്‍ക്കാണ് ഇതിന്റെ പ്രയോജനം ലഭിക്കുക. കുപ്പിച്ചില്ലും പ്ലാസ്റ്റിക്കും ഒഴികെയുള്ള മാലിന്യം ഓരോ വീടിന്റേയും അടുക്കളയോട് ചേര്‍ന്ന് നിര്‍മാര്‍ജനം ചെയ്യാനാകുമെന്നതാണ് ഏറെ സവിശേഷത.
എട്ട് ഇഞ്ച് വണ്ണവും അഞ്ചടി നീളവുമുള്ള പി.വി.സി പൈപ്പ്, ബക്കറ്റ് എന്നിവയോടൊപ്പം ബക്കറ്റ് നിറയെ ബേബി ചിപ്‌സും മാത്രം ഉപയോഗിച്ച് കേവലം 600 രൂപ ചെലവില്‍ മാലിന്യം നിര്‍മാര്‍ജനം ചെയ്യുന്നതോടൊപ്പം അടുക്കളത്തോട്ടത്തിനാവശ്യമായ വളവും ലഭിക്കും. ജമാഅത്തെ ഇസ്ലാമിയുടെ ജനസേവന വിഭാഗമായ ഐഡിയല്‍ റിലീഫ് വിംഗിന്റെ മേഖലാ ക്യാമ്പിനോടനുബന്ധിച്ചാണ് ഈ നൂതന സംരംഭം ആരംഭിച്ചത്. മേഖലാ ക്യാമ്പ് ചീഫ് വിപ്പ് പി.സി. ജോര്‍ജ് ഉദ്ഘാടനം ചെയ്തു. ജമാഅത്തെ ഇസ്ലാമി ജില്ലാ പ്രസിഡന്റ് ഇ.എ. ബഷീര്‍ ഫാറൂഖി അധ്യക്ഷത വഹിച്ചു. മേഖലാ പ്രസിഡന്റ് എ.എം. അലിക്കുട്ടി, നൈനാര്‍ പള്ളി ഇമാം ഇസ്മായില്‍ മൗലവി, കെ.ഇ. പരീത്, എ.എം.എ. ഖാദര്‍, ക്യാമ്പ് കണ്‍വീനര്‍ പി.എഫ്. ഷറഫുദ്ദീന്‍ തുടങ്ങിയവര്‍ സംസാരിച്ചു. 

ബാറിന് പ്രവര്‍ത്തനാനുമതി: സോളിഡാരിറ്റി മാര്‍ച്ച് നടത്തി

ഈരാറ്റുപേട്ട: മീനച്ചിലാറ്റില്‍ മാലിന്യം ഒഴുക്കിയ ബാറിന് പ്രവര്‍ത്തനാനുമതി നല്‍കിയതില്‍ പ്രതിഷേധിച്ച് സോളിഡാരിറ്റി ഈരാറ്റുപേട്ട ഏരിയയുടെ നേതൃത്വത്തില്‍ ബഹുജന മാര്‍ച്ച് നടത്തി. മുസ്‌ലിം ലീഗ് നേതൃത്വത്തിലുള്ള പഞ്ചായത്ത് ഭരണസമിതി പ്രവര്‍ത്തനാനുമതി നിഷേധിച്ച ബാര്‍ ഹോട്ടലിന് പ്രതിപക്ഷ അംഗങ്ങളുടെ നേതൃത്വത്തില്‍ അടിയന്തര പഞ്ചായത്ത് കമ്മിറ്റി ചേര്‍ന്നാണ് പ്രവര്‍ത്തനാനുമതി നല്‍കിയത്. കക്കൂസ് മാലിന്യം മീനച്ചിലാറ്റില്‍ ഒഴുക്കിയതിന് പ്രവര്‍ത്തനാനുമതി നിഷേധിച്ചുകൊണ്ടുള്ള മെമ്മോയാണ് പ്രതിപക്ഷ അംഗങ്ങള്‍ യോഗം ചേര്‍ന്ന് പിന്‍വലിച്ചത്. അടിയന്തര കമ്മിറ്റി വിളിച്ചുചേര്‍ത്ത വൈസ് പ്രസിഡന്റ് പങ്കെടുക്കാതിരുന്നതിനെത്തുടര്‍ന്ന് 14 -ാം വാര്‍ഡ് അംഗം വി.കെ. കബീറിന്‍െറ അധ്യക്ഷതയിലായിരുന്നു യോഗം. 17 അംഗ ബോര്‍ഡിലെ ആറ് പ്രതിപക്ഷ അംഗങ്ങളില്‍ അഞ്ചുപേരും എസ്.ഡി.പി.ഐ അംഗവും ചേര്‍ന്നാണ് കോറം തികച്ചത്.
പഞ്ചായത്തോഫീസ് പടിക്കല്‍ നടത്തിയ യോഗം ബ്ലേഡ് മാഫിയ വിരുദ്ധ സമിതി സംസ്ഥാന സമിതിയംഗം ഒ.ഡി. കുര്യാക്കോസ് ഉദ്ഘാടനം ചെയ്തു. പി.ഡി.പി സംസ്ഥാന സമിതിയംഗം നിഷാദ് നടക്കല്‍, ജില്ലാ സെക്രട്ടറി കെ.ജെ. ദേവസ്യ, സോളിഡാരിറ്റി ജില്ലാ സെക്രട്ടറി വി.എ. ഹസീബ്, ഏരിയാ പ്രസിഡന്റ് പി.എസ്. ഹഖീം, നൗഫല്‍ പാറനാനി തുടങ്ങിയവര്‍ സംസാരിച്ചു. പി.എച്ച്. ഷറഫുദ്ദീന്‍, പി.എസ്.എ. കരീം, പി.എഫ്. റഷീദ്, ഫിര്‍ദൗസ്, നസീര്‍, മാഹിന്‍, സഹീര്‍, സമീര്‍ തുടങ്ങിയവര്‍ നേതൃത്വം നല്‍കി.