പെട്രോള്‍ വില വര്‍ധന: പ്രതിഷേധ മാര്‍ച്ച്

അന്യായമായ പെട്രോള്‍ വില വര്‍ധനക്കെതിരെ സോളിഡാരിറ്റി ഈരാറ്റുപേട്ട ഏരിയ നടത്തിയ പോസ്റ്റ് ഓഫീസ് മാര്‍ച്ച്.

മഅ്ദനി മോചനം: സമര യാത്രക്ക് സ്വീകരണം നല്‍കും

ഈരാറ്റുപേട്ട: ഭരണകൂട ഭീകരതയുടെ ഇരയായി അന്യായമായി ജയിലില്‍ പാര്‍പ്പിച്ചിരിക്കുന്ന അബ്ദുല്‍ നാസ്സര്‍ മഅ്ദനിയുടെ മോചനത്തിന് വേണ്ടി സോളിഡാരിറ്റി കോട്ടയം ജില്ലാ കമ്മറ്റി നടത്തുന്ന വാഹന പ്രചരണ പ്രക്ഷോഭ ജാഥക്ക് ഈരാറ്റുപേട്ട ഏരിയയിലെ വിവിധ സ്ഥലങ്ങളില്‍ സ്വീകരണം നല്‍കും.
ഈ മാസം 22, 23 (വ്യാഴം, വെള്ളി) ദിവസങ്ങളില്‍ നടത്തുന്ന ജാഥ വ്യാഴാഴ്ച രാവിലെ എട്ട് മണിക്ക് പാലായില്‍നിന്ന് ആരംഭിക്കും. ഏറ്റുമാനൂര്‍, അതിരമ്പുഴ, മെഡിക്കല്‍ കോളേജ്, സംക്രാന്തി, ഇല്ലിക്കല്‍ പള്ളി, കാരാപ്പുഴ, കോട്ടയം, ചിങ്ങവനം, കുറിച്ചി , ചങ്ങനാശ്ശേരി, പെരുന്ന, തെങ്ങണ എന്നിവിടങ്ങളില്‍ പര്യടനം നടത്തി ഒന്നാം ദിവസം സമാപിക്കും.
രണ്ടാം ദിവസമായ വെള്ളിയാഴ്ച ഈരാറ്റുപേട്ടയിലെ കാരക്കാട് നിന്ന്  രാവിലെ ആറ് മണിക്ക് പര്യടനം തുടങ്ങും. പത്താഴപ്പടി (6.45), അമാന്‍ (7.30),  ഹുദാജംഗ്ഷന്‍ (8.30), പ്രൈവറ്റ് ബസ്റ്റാന്റ് (9.15), കടുവാമുഴി (10.45), തെക്കേകര (11.30) എന്നിവിടങ്ങളിലെ പരിപാടികള്‍ക്കു ശേഷം കാഞ്ഞിരപ്പള്ളിയിലേക്ക് പോകും. പാറത്തോട്, എരുമേലി, പെരുവന്താനം എന്നിവിടങ്ങളിലെ സ്വീകരണ ശേഷം മുണ്ടക്കയത്ത് വൈകുന്നേരം 6.30 ന് സമാപിക്കും.

ബാര്‍ വിവാദം: പി.സി. ജോര്‍ജ് എം.എല്‍.എയുടെ കോലം കത്തിച്ചു

ഈരാറ്റുപേട്ട: ഈരാറ്റുപേട്ടയിലെ പുതിയ ത്രീസ്റ്റാര്‍ ഹോട്ടല്‍ ബാര്‍ ഹോട്ടലായി ഉയര്‍ത്താന്‍ അശ്രാന്തപരിശ്രമം നടത്തിയ സ്ഥലം എം.എല്‍.എ പി.സി. ജോര്‍ജിന് താക്കീതായി സോളിഡാരിറ്റി, പിഡിപി പ്രവര്‍ത്തകര്‍ ബാര്‍ ഹോട്ടലിനു മുന്നില്‍ ചിഫ് വിപ്പിന്റെ കോലം കത്തിച്ചു. നാടിനുവേണ്ടത് വികസനമാണെന്നും ബാര്‍ ഹോട്ടലുകളെല്ലെന്നും യുവതയെ മദ്യത്തില്‍ മുക്കി യൗവനത്തെ നശിപ്പിക്കുന്ന ഇത്തരം പ്രവണതകളില്‍ നിന്നും ജനപ്രതിനിധികള്‍ വിട്ടുനില്‍ക്കണമെന്നും സംഘാടകര്‍ ആവശ്യപ്പെട്ടു. പെരുമഴയിലും ആവേശം ചോരാതെ നടത്തിയ പ്രകടനം ഏറെ ജനശ്രദ്ധ പിടിച്ചുപറ്റി.